عمر بن الخطاب

في رمضان كان فيه كمية رهيبة من المسلسلات و بما اني مش من الهواه بس الفراغ يخلي الواحد ساعات يشوف فيه ايه و بما اني دايما مستفزه (العادي بتاعي) اتفرجت بالعند في الناس اياها على كام حلقة من مسلسل عمر وبصراحة كان الغرض اشوف كل الدوشة بتاعت تجسيد الصحابة ورفض عرض المسلسل من الشيوخ اللي شايفين ان كلامهم امر وطاعة لزمته اية ... المهم شوية كده وانشغلت بس المسلسل يشهد له بالروعة وعلشان كده انا ح اتفرج عليه بهدوء الايام دي تاني وبشويش القصد لما تجادلت في الموضوع مع الاخت لقيتها بتقول ان العلماء والشيوخ مش عايزين صورة الصحابة تتعلق في الاذهان بصورة ممثل ممكن يعمل ادوار تانية وده كان الراي الاكثر موضوعية لناس وسطية .. والله وجهه نظر خاصا وانا واحدة من الناس اللي اول ما حد يقول حمزه عم الرسول ص اول واحد بيجي على بالي هو عبد الله غيث الله يرحمه في فيلم الرساله .. بس سالت طب وفين المشكله ما في مسلسلات كتير السيده مريم و سيدنا عيسي و سيدنا يوسف فيه ممثلين جسدوهم ايه يعني ! ... ده حتى حمزه و ابو بكر و علي و عمر مش رسل دول صحابه وخلفاء راشدين ناس كتير مكسله تعرف اي حاجه عنهم والمسلسل اهه منفعه ... الرد كان مقنع برضه ان زي ما مثلا نبيله عبيد جسدت رابعة العدوية وبعدين عملت افلام استغفر الله ده ممكن يحصل ... صح وممكن بس ده برضه مالوش علاقة برابعة ولا ينتقص منها انا بقى لي وجهة نظر مخالفة جدا ... و كنت بتفرج على مسلسل عمر و فجاءه سالت نفسي ... الله ده عمر و ابو بكر و هما كفار بس ساده في قريش قبل الاسلام كانوا لابسين لبس ابهه قوي و بعد الاسلام وهما خلفاء راشدين و برضه ساده حالهم بقى لا حول ولا قوة الا بالله .. واضحة هه ... عمر كان بدقن قبل و بعد الاسلام وده راجل كان كافر بدقن وخليفة المسلمين ومن الصحابة الاولين و من الاخر كده سلف صالح يعني كده بدقن وكده بدقن ...واضحه برضه .. عمر لما كان بيصلي كان بيصلي في حماية ربنا زيه زي الناس .. ولما كان بيخطب في الناس كان الستات والرجاله حواليه من غير ما يفصل حد ... ولما غلط و امراه رجعته اعتذر للست واقر غلطه ...واضحة .. عمر كان بيبكي خوف وهلع من ربنا وسمح بعدم قطع يد السارق اللي سرق من كتر جوعة وكان مرعوب ومش بينام خايف من عقاب ربنا ... و غيره وغيره اللي انا بقي شكه فيه ان قد يكون خوف علماء الدين وشيوخ النهارده هو من تجسيد افعال عمر وليس شكله لان في النهاية ... طويل قصير تخين رفيع مش ح يفرق معانا ... عمر مش رسول علشان يزعلوا قوي كده.. . ده بشر ومن الصحابه ..اللي ح يجسد دوره مش ح يكون همه الشكل بس الاهم وده اللي كتير ناسيه او بيتناسااااه هو افعال واخلاق وخشوع عمر ورحلته من الكفر الي اليقين ... كالعاده الكل ساب المضمون وماسك في الهيافه اتفرجوا على عمر ابن الخطاب